ក្នុងឱកាសអញ្ជើញជាអធិបតីក្នុងពិធីបើកពិព័រណ៍សៀវភៅ Big Bad Wolf Books ជាលើកទី២ នៅរាជធានីភ្នំពេញ នាព្រឹកថ្ងៃទី២២ ខែកុម្ភៈ លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានថ្លែងថា៖ ពិព័រណ៍សៀវភៅ Big Bad Wolf Books បានចាប់ផ្ដើមរៀបចំជាលើកទី១ក្នុងឆ្នាំ ២០២០ហើយពេលនោះការតាំងពិព័រណ៍សៀវភៅនេះទទួលបានការស្វាគមន៍ និងគាំទ្រពីសាធារណជន ក៏ដូចជាអ្នកចូលចិត្តអានសៀវភៅមានចំនួនច្រើនលើសពីការរំពឹងទុក។
លោករដ្ឋមន្ត្រី បានបញ្ជាក់ថា ការទទួលបានភាពជោគជ័យនៃពិព័រណ៍នេះ គឺដោយហេតុថាសៀវភៅដែលយកមកដាកតាំងលក់សុទ្ធសឹងជាប្រភេទសៀវភៅថ្មីៗដែលមានស្នាដៃល្អៗ មានគុណភាពខ្ពស់ ហើយជាពិសេសនោះមានតម្លៃទាបជាងទីផ្សារ។
លោករដ្ឋមន្ត្រី ខៀវ កាញារីទ្ធ បានចាត់ទុកការតាំងពិព័រណ៍សៀវភៅ Big Bad Wolf Books នៅកម្ពុជានាពេលនេះគឺមានសារសំខានណាស់ក្នុងការចូលរួមចំណែកលើកកម្ពស់វប្បធម៌នៃការអាន ហើយនឹងផ្តល់ឱកាសដល់ប្រជាជនកម្ពុជា ដើម្បីទទួលបានបទពិសោធក្នុងការទិញសៀវភៅដែលមានគុណភាពល្អ និងមានតម្លៃមួយដ៏សមរម្យ។
លោករដ្ឋមន្ត្រី ក៏ បានស្នើដល់លោក Andrew Yap សហស្ថាបនិក Big Bad Wolf Books បន្តរៀបចំការតាំងពិព័រណ៍នេះជារៀងរាល់ឆ្នាំនៅកម្ពុជា និងពិនិត្យលទ្ធភាពពង្រីកកម្មវិធីតាំងពិព័រណ៍នេះនៅតាមបណ្ដាខេត្តនានារបស់កម្ពុជាផងដែរ។
លោកស្រី ទន់ សាអ៊ីម អនុរដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍ថា៖សៀវភៅជាទុនដ៏មានសារៈសំខាន់ក្នុងការបណ្តុះបណ្តាលចំណេះដឹងបន្ថែមហើយការអានជាការបណ្តុះនូវវប្បធម៌ស្រូបយកចំណេះដឹងមកបម្រើខ្លួនឯង គ្រួសារ សង្គម និងជួយអភិវឌ្ឍប្រទេសជាតិ។
លោកស្រីអនុរដ្ឋលេខាធិការ បានបន្តថា៖ពិព័រណ៍សៀវភៅ Big Bad Wolf លើកទី២នេះ មានសៀវភៅច្រើនរូបភាព ច្រើនប្រភេទដែលងាយស្រួលក្នុងការជ្រើសរើសសម្រាប់សិស្ស និស្សិត និងអ្នកចូលចិត្តអានសៀវភៅ។
លោក Andrew Yap បានមានប្រសាសន៍ថា៖ក្នុងរយៈពេលជាង១០ឆ្នាំនេះ Big Bad Wolf Booksបានរៀបចំពិព័រណ៍សៀវភៅដ៏ធំបែបនេះជាច្រើនលើករួចមកហើយនៅប្រទេសចំនួន១៥ដែលមាននៅ៣៧ទីក្រុងហើយពិព័រណ៍សៀវភៅនេះក៏បានចាប់បើកជាលើកដំបូងនៅកម្ពុជាកាលពីឆ្នាំ២០២០ក្នុងគោលបំណងកសាងវប្បធម៌នៃការអាននៅកម្ពុជាដោយនាំមកសៀវភៅជាភាសាអង់គ្លេសដែលមានតម្លៃសមរម្យសម្រាប់មនុស្សគ្រប់រូប។ លោក Andrew បានថ្លែងឲ្យដឹងថា ឆ្នាំ២០២៣នេះ Big Bad Wolf Books នឹងដាក់តាំងពិព័រណ៍សៀវភៅដ៏ធំនេះជាថ្មីម្ដងទៀត នៅរាជធានីភ្នំពេញ ចាប់ពីថ្ងៃទី២២ ខែកុម្ភៈ ដល់ថ្ងៃទី១២ ខែមីនា ឆ្នាំ២០២៣ ហើយចាប់បើកដំណើរការពីម៉ោង ៩ព្រឹក ដល់ម៉ោង ១២យប់ នៅផ្សារទំនើបអូឡាំព្យា។
លោកបានបន្តថា៖ពិព័រណ៍នេះនឹងផ្តល់ឱកាសដល់ប្រជាជនកម្ពុជាដើម្បីទទួលបាននូវបទពិសោធន៍ក្នុងការទិញសៀវភៅភាសាអង់គ្លេសដែលមានគុណភាពល្អ និង ថ្មីៗ ក្នុងតម្លៃមួយដ៏សមរម្យ។ វាមានសារៈសំខាន់ណាស់ ក្នុងការរៀនភាសាថ្មីមួយ និង បង្រៀនឱ្យមនុស្សមានទម្លាប់អានតាំងពីក្មេងទើបធ្វើអោយ ក្មេងៗជំនាន់ក្រោយធំដឹងក្តីពោរពេញដោយចំណេះដឹង។
ពិព័រណ៍សៀវភៅ Big Bad Wolf Book នឹងចូលរួមជួយសង្គមតាមរយៈការបរិច្ចាគសៀវភៅចំនួន ៣០០ក្បាល ទៅកាន់បណ្ណាល័យកំពង់ត្របែក ៕Ph
រដ្ឋមន្ត្រីពត៌មាន៖ការតាំងពិព័រណ៍សៀវភៅ Big Bad Wolf Books នៅកម្ពុជាគឺមានសារសំខាន់ណាស់ក្នុងការចូលរួមចំណែកលើកកម្ពស់វប្បធម៌នៃការអាន
22 FEB 2023
THAILAND